Biisser Dammen Turnveräin
Schonn zanter bal 40 Joer besteet de Biisser Dammen Turnveräin. Déi éischt Statute goufen den 12. Dezember 1985 hannerluecht. Op der Generalversammlung vun 2023 hu mir eisen Numm geännert, eise Klub heescht elo Bi-Fit asbl., an ass souwuel fir Frae wéi och fir Männer op. An der Saison 2023/2024 hate mer 186 aktiv Memberen, déi sech op 13 verschidde Course verdeelt hunn. Ganz vill komme méimools an der Woch, well jo d’Coursen och ganz ënnerschiddlech sinn. Bekanntlech mécht et vill Spaass an et kritt een och méi Kraaft, wann een an engem Grupp schweesse kann. Sämtlech Course gi gehal vum Steffi Jurkszajtis a vum Fraenz Nickels.
D’Course sinn an der neier Sportshal 1, rue des Sports L-7795 Biissen, wou de Bi-Fit e Sall am 2. Sous-sol huet. Déi ganz Offer fannt Dir och am Uschloss.
Natierlech läit den Haaptakzent vum Club op dem Sport, mä och de sozialen Aspekt ass net ze vergiessen. De Bi-Fit organiséiert all Joer am Fréijoer en Thé dansant, hëlt am Juni un der Nuit des Sports deel an ass feste Bestanddeel vum Chrëschtmaart. Do derbäi fënnt ee Vertrieder vum Club bei alle Manifestatiounen, déi vun der Gemeng organiséiert ginn. Fir eis Memberen offréiere mir den éischte Samschdeg am Januar den Neijoerschspatt an zum Ofschloss vun der Saison ass dat traditionellt Grillfest.
Momentan besteet de Comité aus 8 Memberen: Präsidentin: Rita Szkolik-Hillmann, Vizepräsidentin: Renée John-Heynen, Caissière: Gaby Marnach-Conzemius, Sekretärin: Josiane Kiefer-Schaul, Memberen: Edith Roilgen, Elodie Cotto, Berthy Engelmann-Fonck, Nelly Michels-Scheltgen.
